Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Gənc Mühasiblər İctimai Birliyi tərəfindən Bakı və Gəncə şəhərlərində “Universitetlərdə yeni standartlara uyğun mühasibat uçotu üzrə vahid tədris proqramının hazırlanması və müzakirələrin keçirilməsi” layihəsi çərçivəsində 6 iyul 2018-ci il tarixində Sumqayıt Dövlət Universitetində görüş keçirilib. Layihənin əsas məqsədi bu gün ölkədə yeni standartlara uyğun mühasibat uçotuna keçidlə bağlı universitetlərdə vahid tədris proqramının ilkin versiyasının hazırlanması, aidiyyatı qurumlara təqdim olunmasından ibarətdir.
Görüşdə SDU-nun İqtisadiyyat və idarəetmə fakültəsinin dekanı dosent Aynurə Yəhyayeva, Maliyyə və mühasibat uçotu kafedrasının müdiri dosent Loğman Abdullayev və kafedranın əməkdaşları; Gənc Mühasiblər Birliyinin sədri Solmaz Əliyeva və birliyin üzvləri Kəmaləddin Quliyev, Rauf Rzayev; Bakı Mühəndislik Universitetinin Mühasibat uçotu və audit kafedrasının müdiri Firudin Sultanov, BMU-nun baş müəllimləri Qalib Mikayılov, Sənan Hüseynzadə; “Sinam” MMC ERP sistemlərin tətbiqi şöbəsinin müdir müavini Elşən Şərifov, Maliyyə analitiki İbrahim Süleymanov iştirak edirdilər.
İlk öncə tədbiri giriş sözü ilə açan birliyin sədri Solmaz Əliyeva layihə haqqında ətraflı məlumat verdi. Bildirdi ki, universitetlərdə görüşlər yekunlaşdıqdan sonra səsləndirilən təkliflərin yekun müzakirəsi üçün Təhsil Nazirliyinin, Maliyyə Nazirliyinin, ekspertlərin və universitet nümayəndələrinin iştirakı ilə Bakı şəhərində dəyirmi masanın keçirilməsi nəzərdə tutulmuşdur.
Tədbirdə İqtisadiyyat və idarəetmə fakültəsinin dekanı dosent Aynurə Yəhyayeva çıxış edərək bu cür layihələrin mühasibatlığın inkişafındakı əhəmiyyətindən, mövcud problemlərin həllinin tapılmasında böyük rol oynayacağını bildirdi və bugünkü görüşün Sumqayıt Dövlət Universitetində keçirilməsini yüksək qiymətləndirdi. Qeyd etdi ki, sıx əməkdaşlıq etməklə bu sahənin inkişafına böyük töhfə olacaq.
Maliyyə və mühasibat uçotu kafedrasının müdiri dosent Loğman Abdullayev SDU-da Mühasibat uçotu və audit ixtisası üzrə tədris olunan dərs proqramları barədə çıxış etdi. Mövcud mühasibat uçotu proqramı nəzərdən keçirildi.
Daha sonra tədbir iştirakçıların müzakirələri ilə davam etdirildi və təkliflər səsləndirildi.

Mətbuat Xidməti