UNEC-də “SƏS” Media Qrupunun birgə təşkilatcılığı ilə 20 Yanvar hadisələrinin 29-cu il dönümü ilə əlaqədar tədbir keçirilib.
Tədbir rektor, professor Ədalət Muradovun, "SƏS" Media Qrupunun rəhbəri Bəhruz Quliyevin, Dini Qurumlarla İş üzrə Dövlət Komitəsinin tabeliyində olan Mənəvi Dəyərləri Təbliği Fondunun icraçı direktoru Mehman İsmayılovun və Şəhid ailələrinin üzvlərinin iştirakı ilə UNEC-in Memorial-Xatirə Kompleksinin ziyarət olunması ilə başlayıb.
UNEC-in professor-müəllim heyətinin, tələbələrin iştirakı ilə davam edən tədbirin açılışı zamanı vətən uğrunda canlarından keçmiş Şəhidlərin əziz xatirəsi bir dəqiqəlik sükutla yad edilib. “SƏS” Media Qrupu tərəfindən hazırlanmış “20 Yanvar: Azadlıq Dastanı” adlı film tədbir iştirakçılarını bir daha faciənin baş verdiyi illərə qaytarıb. Filmdə Sovet rejiminin dinc əhaliyə qarşı törətdiyi kütləvi qırğının, insanların müstəqillik arzularını məhv etmək cəhdinin milli qürurumuzu qıra bilməməsi barədə danışılıb. Günahsız insanları gülləbaran edən Sovet rejimi tərəfindən təşkil edilmiş hadisələr zamanı Azərbaycanın o vaxtki rəhbərliyinin acizliyi bir daha üzə çıxıb. Məhz bu zaman, o müdhiş günlərdə xalqımızın Ümummilli lideri Heydər Əliyev Moskvada Azərbaycan nümayəndəliyinə gələrək təcavüzə kəskin ittiham edərək, etiraz səsini ucaldıb, qoşunların Bakıdan dərhal çıxarılmasını tələb edib. Ulu öndərin qətiyyətli addımı 20 Yanvar hadisələrinə veriliən ilk siyasi qiymət olub. Məhz xalqın təkidli tələbi ilə Heydər Əliyev hakimiyyətə qayıtdıqdan sonra ölkədə Qanlı Yanvara siyasi qiymət verilib. Ulu öndərin göstərişi ilə Şəhidlər Xiyabanında Memorial Kompleks ucaldılıb, 20 Yanvar Ümumxalq hüzn günü kimi təsis olunub, Şəhid ailələri dövlət qayğısı ilə əhatə edilib.
Film nümayişindən sonra UNEC-in rektoru, professor Ədalət Muradov çıxış edib. Şəhidlərin xatirəsinin UNEC-də daim ehtiramla yad edildiyini və əziz tutulduğunu vurğulayan rektor onların arasında Azərbaycan Dövlət İqtisad Universitetinin tələbələrinin olmasını universitetin qürur mənbəyi adlandırıb. Rektor 20 Yanvarın Ümumxalq Hüzn günü olmaqla yanaşı, Azərbaycanın müstəqilliyi uğrunda mübarizə aparan xalqımızın tarixinə birlik və şərəf günü kimi yazıldığını qeyd edib. Şəhidlərin xatirəsinin əbədi olduğunu bildirən rektor, hər bir azərbcanlının onlar qarşısında borclu olduğunu qeyd edib. Torpaqlarımız düşmən tərəfindən işğalı davam etdikcə şəhidlərin ruhunun rahat olmayacağını bildirən rektor, Azərbaycan Respublikasının Prezidenti İlham Əliyevin qətiyyətli, uzaqgörən siyasəti nəticəsində torpaqlarımızın azad ediləcəyinə əmin olduğunu bildirib.
Dini Qurumlarla İş üzrə Dövlət Komitəsinin tabeliyində olan Mənəvi Dəyərlərin Təbliği Fondunun icraçı direktoru Mehman İsmayılov çıxışı zamanı şəhidliyin fəqli, xüsusi bir dəyər olduğunu vurğulayıb. Şəhidlik sözünün əhəmiyyəti haqqında danışan qonaq, 20 Yanvar hadisələrinin həmçinin xalqın özünə qayıdışı simvolu olduğunu bildirib. Gənc nəsil arasında bu istiqamətdə təbliğatın aparılmasının zəruriliyini qeyd edən M.İsmayılov, bütün gəncləri bu amallara sarılmağa dəvət edib.
"SƏS" Media Qrupunun rəhbəri Bəhruz Quliyev 20 Yanvar hadisələrinin görünən və görünməyən tərəflərinin olduğunu bildirib. 80-ci illərdə Sovet rejiminin dağılması və Dağlıq Qarabağın Ermənistana verilməsi prosesi Azərbaycanda xalq etirazlarının bir hərəkata çevrilməsinə səbəb olub. Bu yol bizi müstəqilliyə gətirsə də, xalqın qanı bahasına başa gəlib. Ümumilli liderə təzyiqlərin olmasına baxmayaraq o Azərbaycanın Moskvadakı nümayəndəliyinə gələrək öz etirazını bildirib, xalq Ulu öndərin hakimiyyətə gətirilməsini tələb edib. İndi də Heydər Əliyev siyasətinin ölkədə davam etdiyini bildirən qonaq dövlətin şəhid ailələrinə dəstəyi, ölkədə insan amilinin aparıcı rola malik olması, xalqın öz lideri, Azərbaycan Respublikası Prezidenti İlham Əliyevə bağlılığı barədə danışıb.
Tədbirdə 20 Yanvar şəhidi İlqar Əbilhəsənovun qardaşı Yavər Əbilhəsənov çıxış edərək hər il ölkədə Qanlı Yanvar qurbanlarının xatirəsinin əziz tutulduğunu bildirib. Qanlı Yanvar qırğınlarının Azərbaycanın o vaxtki rəhbərliyinin qətiyyətsizliyi səbəbbindən baş verdiyini qeyd edən Y.Əbilhəsənov, hadisələrin baş verdiyi günlərdən sonra o vaxtki ölkə rəhbərliyi tərəfindən heç bir cinayət işinin açılmadığını, araşdırmanın aparılmadığını bildirib.
Tədbirin sonunda İqtisadiyyat fakültəsinin tələbəsi Rəşad Aslanov Bəxtiyar Vahabzadənin “Şəhidlər” şeirini oxuyub.

UNEC-in Mətbuat Xidməti