Bakı Ali Neft Məktəbinin (BANM) təşkilatçılığı ilə Böyük Britaniyanın “TwentyEighty Strategy Execution” (“STRATEX”) şirkəti və Amerika Birləşmiş Ştatlarının Corc Vaşinqton Universiteti tərəfindən birgə həyata keçirilən Layihə İdarəetmə Məktəbinin (SPM) tədris proqramının yeni qrupunun açılış mərasimi keçirilib.
Layihə İdarəetmə Məktəbinin növbəti tədris proqramı üçün bu dəfə aparıcı 10 müəssisəsinin 24 nümayəndəsi seçilib. Təlim proqramının iştirakçıları arasında BP, Socar AQŞ, Socar Polymer, Paşa holdinq, Azercell, ABB, Azərbaycan Respublikasının Konstitusiya Məhkəməsi, İqtisadiyyat Nazirliyi və Beynəlxalq Qırmızı Xaç Komitəsi kimi qurum və şirkətlərin rəhbər işçiləri, menecer və məsul əməkdaşları var.
Ali məktəbin rektoru Elmar Qasımov açılış mərasimində hər bir iştirakçı ilə yaxından tanış olub və təlim proqramını uğurla başa vurmağı arzulayıb. Rektor, həmçinin sürətlə dəyişən dünyada bacarıqların bilikdən daha ön planda olduğunu və SPM-in təlim proqramında bacarıqların öyrədilməsinin vacibliyini təlim iştirakçılarının diqqətinə çatdırıb.
Ölkənin aparıcı şirkətlərinin və dövlət, eləcə də beynəlxalq qurumlarının rəhbər nümayəndələri və aparıcı mütəxəssislərindən ibarət olan iştirakçıların hər biri özləri haqqında qısa məlumat veriblər.
Təlim proqramı ABŞ-ın Corc Vaşinqton Universitetinin magistr proqramına əsaslanır və 10-12 ay ərzində ayda 3-4 gün keçiriləcək.
Proqram 7 moduldan ibarətdir:
Layihələrin idarə olunması;
Xərclərə (büdcəyə) nəzarət;
Risklərin idarə olunması;
Liderlik və kommunikasiya;
Layihə menecerləri üçün keyfiyyət;
Layihələrin idarə olunmasının tətbiqi mexanizmləri;
Seçmə modul (Layihə menecerləri üçün danışıqların aparılması bacarıqları və ya PMP (Professional layihə meneceri) imtahanına hazırlıq).
Hər bir modulun sonunda təlim proqramının iştirakçıları imtahan verirlər və nəticədə modulu bitirmələri haqqında sertifikatla təltif olunurlar. Eyni zamanda, proqramı tam bitirdikdən sonra Corc Vaşinqton Universitetinin layihə idarəetməsi üzrə magistr sertifikatı ilə təltif olunurlar.
SPM tədris proqramında iştirak beynəlxalq səviyyədə qəbul edilən Layihə İdarəetmə İnstitutunun professional layihə meneceri sertifikatını almaq üçün mühüm əhəmiyyəti var. Proqramı bitirdikdən sonra iştirakçılar həmin imtahana qatıla bilərlər.
Hər il dövlət və özəl sektorda fəaliyyət göstərən şirkətlər BANM-in təşkilatçılığı ilə həyata keçirilən Layihələri İdarəetmə Məktəbinə böyük maraq göstərərək, öz əməkdaşlarının ixtisasartırması üçün onların bu proqramda iştirakına üstünlük verir. 2016-cı ildən fəaliyyətə başlamış Layihə İdarəetmə Məktəbinin indiyə qədər sayca 7 milli buraxılışı olub.
Təlim proqramında iştirak edən hər kəs idarəetmə sahəsində peşəkar bilik, riskləri əvvəlcədən düzgün qiymətləndirmək və mənfi təsir edəcək risklərlə mübarizə bilikləri, eləcə də şirkət daxilində yarana biləcək problemləri əvvəlcədən müəyyənləşdirmək kimi bacarıqlar qazanır.

Tehsil-press.az