Azərbaycan Dövlət İqtisad Universiteti (UNEC) ilə Bakı Yunus Əmrə İnstitutu arasında türk dilində tədrisin inkişafına dair protokol imzalanıb.
Sənədə əsasən, UNEC-də türk dilinin tədrisində Avropa Dil Portfeli və beynəlxalq dil tədrisi standartlarına görə hazırlanan “Yunus Əmrə İnstitutu Modeli”nin tətbiqi nəzərdə tutulur. Eyni zamanda, UNEC-lə Bakı Yunus Əmrə İnstitutu türk dilinin tədrisi sahəsində ortaq elmi araşdırmaları davam etdirəcəklər.
Tədbirdə universitetin rektoru, professor Ədalət Muradov Türkiyə ali təhsil müəssisələri ilə əlaqələrin əhəmiyyətindən, əməkdaşlıq çərçivəsində imzalanan ikitərəfli razılaşmalar, ikili diplom proqramları, 50-dək ali məktəblə reallaşdırılan Mövlanə Proqramından danışıb. O, bu əməkdaşlığın UNEC-də türk dilində tədrisin aparılmasına böyük imkanlar yaratdığını diqqətə çatdırıb.
Bakı Yunus Əmrə İnstitutunun müdiri İbrahim Yıldırım Cənubi Qafqazın ən böyük iqtisadyönümlü universiteti olan UNEC-in Türkiyə ali təhsil müəssisələri ilə əlaqələrini yüksək dəyərləndirib.
Sonra iki qurum arasında türk dilində tədrisin inkişafına dair protokol imzalanıb.
Sənədi professor Ə.Muradov və İ.Yıldırım imzalayıblar.

UNEC-in Mətbuat xidməti