Bakı Dövlət Universitetinin (BDU) Kimya fakültəsində “Alkenilfenollar əsasında xüsusi məqsədli və texniki əhəmiyyətli maddələrin alınmasının perspektiv istiqamətləri” mövzusunda onlayn elmi seminar keçirilib.
Seminarda Kimya fakültəsinin professor-müəllim heyəti və tələbələri, AMEA-nın Aşqarlar Kimyası və Polimer Materialları, Neft-Kimya Prosesləri İnstitutlarının, Milli Nüvə Tədqiqatları Mərkəzinin və digər qurumların əməkdaşları, o cümlədən akademik Vaqif Fərzəliyev, AMEA-nın müxbir üzvləri Bəxtiyar Məmmədov və Valeh Cəfərov iştirak ediblər.
Alkenilfenollar kimyası elmi-tədqiqat laboratoriyasının müdiri, professor Musa Bayramov “Alkenilfenollar əsasında xüsusi məqsədli və texniki əhəmiyyətli maddələrin alınmasının perspektiv istiqamətləri” mövzusunda məruzə ilə çıxış edib. Məruzədə son illər dünyada polifunksional alkenilfenollar əsasında mikroelektronikada, aviasiyada, neftçıxarma və neft emalı sənayesində tətbiq olunan məhsulların alınması istiqamətində intensiv elmi tədqiqat işləri aparıldığı, eləcə də ağır metalların və radionuklidlərin müxtəlif sistemlərdən ayrılmasında tətbiq olunan polifunksional sorbentlərin sintezində bu növ monomerlərdən geniş istifadə olunması haqqında məlumat verilib.
Seminarda Alkenilfenollar kimyası elmi-tədqiqat laboratoriyasında da bu istiqamətdə geniş tədqiqat işləri aparıldığı vurğulanıb. Bu sahədə 20-dən çox yerli və bir Avrasiya patenti alındığı, “Uspexi ximii” jurnalında iki icmal məqalənin və Moskvada bir monoqrafiyanın nəşr olunduğu bildirilib.

Tehsil-press.az